Ti kuna dagiti mamanakem, "adda panagpatingga ti amin." Kuna met daydi amak, "Awan ti tao a bimmato!"
Dagitoy a sasao ket isu da ti mangipasimudaag nga ti amin nga adda ket dumteng dan to iti pangpatengga... Nairamanen dita ti biag ti tao.
Idi napan a Sabado (16 ti mabilang iti daytoy a bulan ti Uktubre 2009), napanak dimmanggay a nanglinglingay ken nakipagladingit iti pamilya ti maysa a gayyem ko gapwen ta ti ingunguten da nga ina ket isu ti pimmusay. Ti karabiiyan daytoy nga aldaw ket isu met laengen ti kunada nga maudin a rabii ti pannakaimassayag ti bangkay nga banbantayan da gapu ta maitanemen daytoy iti sumarunu nga agsapa.
Nagbiyahe ak ngarud nga napan idiay Bagabag, Nueva Vizcaya iti agarup alas once y media iti bigat; nagluganak iti maysa nga van idiay Dangwa terminal iti likod ti Center Mall. Nagluwas kami iti tingnga ti aldaw ket adda nga inkam tinurng ti Magsaysay Road sa kami nagpakannigid nga nagpa-Bokawkan Road idi makadanun kamin idiay Magsaysay flyover.
Iti apagdarikmat addan nga sursursuren mi ti Marcos Highway. Napintas ti mulagat ti init iti agkukuterter pay laeng nga siyudad maigapu iti kapalpalabas nga didigra nga isangpet ni Pepeng. Numanpay kasta, ti pudot nga itintinnag ti law-ang ket umanayen nga mangited iti namnama ken tured ti pakinakem para kadagiti nadangranan ken naawanan..
Ngem ti kinaranyag ti silnag ti init ket saan nga umanay tapno puraren na dagiti mata nga siririing iti kinapudno nga ti daga ket sugat sugat ket adda nga umar-arungaing iti sangkata'wan.
Riggaay ti daga iti ngatuen ti sementado nga kalsada to kumablaaw kenka apaman a sumrek ka iti sungadan ti Marcos Highway nga bumaba iti prubinsiya ti La Union. Bassit laeng ti napisang nga bakras iti umuna... ngen bayat nga pumarpartak ti taray ti lugan nga mangitunda kenka iti mapanam, ad-adda met nga mangngeg mo ti ikkis ti aglawlaw babaen kadagiti pitak ken bato nga naipenpen iti igid ti kalsada. Nakaal-alinggaget nga panunuten nu anya ken kasanu ti namsaakan ti napigsa nga sangit ti langit kadagiti napalabas nga al-aldaw.
Saan met nga mailisi iti panunot ti kasasaad ti maysa nga gayyem nga adda nga naulilan iti ipapanaw ti dungdungwen na nga ina. Kabayatan na nga innak matmatmatan dagiti bakras ti bantay a nasugatan, diak maikkat iti panunot ko nu kasanu na nga sarsarangeten iti agdama ti nasaem unay a pasamak iti biag na.
Ti dalan ket nawatiwat... Adda nga agikkis ti ubet iti napudut nga tugawan.. Ahehehehe! Ngem uray nu kasta, masapul nga anduran. Di tay dumteng iti pagturungan nu di tay sangwen ti karit ti ipapan.
Dimteng ti malem, dimteng ti rabii... Di napupuutan, dimteng kamin idiay Solano. Bimmabaak ngarud iti sangu ti McDonald's ta kunak nga mapanak agbiruk iti mabalin nga pangalaan iti pamedped iti nabisinan a tiyan.
Padaanan tayo ti tuloy na...
